Archive for the ‘Tula’ Category

Nag-uunahan ang mga letra
Sa pagbuo ng mga salita
Mga salitang gustong kumawala
At isampal sa kanyang mukha.

Panibugho ang sinapit
Nang sinubukang igiit
Mga suhestiyong kaakit-akit
Hinarang niyang pilit.

Ano’t tinig mo lang ang narinig
Nasaan ang demokrasyang ibig
Iba ang baluktot sa tuwid
Yaong una yata ang ‘yong hilig.

Di lang yan may isa pa
Nasa kanan kong silya
Upong inosente’t bida
Ngunit hunyango pala.

Ang katauha’y nag-iba
Mga paninindiga’y nabura
Iniwan akong nag-iisa
Tiwala ko’y tinapon niya.

O ang tao nga naman
Hindi tao kung minsan
Di magamit ang isipan
Paggamit ng puso’y iniiwasan.

Marahil mali ang umasa
Na malawak ang isip ng kasama
Anumang buti ng nasa
Balik lang nito ay dusa.

Nauna man sila ng isang taon
Di ibig sabihin ako’y pakakahon
Di susunod sa alon
At di patatangay na tila dahon.

Kumawala na ang mga letra
Nabuo na ang mga salita
Mananatili ang lahat sa ‘king diwa
Sa papel, hangi’t kalakhang Maynila.

 

0


*I do not own the posted image. All rights belong to its rightful owner.

Ang mga salitang namutawi

Kailanma’y di na mababawi

Naisin ko mang balikan

Nang naiwasan ka sanang masaktan

Ay hindi na maaari

Ito’y di na mangyayari

Pagka’t nagdusa na’t naging sawi

Nangyari na ang nangyari

Dulot ng hangal kong puso’t isip

Ngayon ika’y iniisip

Kalimutan mang pilit

Alaala na’y nakaguhit

Sa bawat bahagi ng titik

Ng malungkot na pintig

Ng aking tibukan ng buhay

Na siguro’y tuluyan ko na lamang….. ihihimlay.

 walked-away

 







*I do not own the posted image. All rights belong to its rightful owner.

Blank notepad and pencil

Kung ako’y lilisanin na
Ng kakayahang magpinta
Ng mga salita at istorya
Sa mga gabing kapiling ka
Ng mga alaala ng pag-iisa
O aking sinta
Sige, ako’y lisanin mo na.

Kung ako’y tinatakasan na
Ng mga angkop na salita
Ng mga tugma at hiwaga
Ng sanaysay at tula
Ng nobela na malaya
Ngayon pa lang o sinta
Sige, ako’y lisanin mo na.

Ngunit…

Kung ibig mo pang bumalik
O kung magbabago ang isip
Kung ibig mo nang manatili
Sa aki’y humalik
Pawiin ang pangungulimlim
Ang puso ko’y liwanagin
Ang nais ko lang sabihin…

O liyag huwag mo akong lisanin.


*I do not own the posted image. All rights belong to its rightful owner.